Christian Roger DAGNAN
LÄNGÖ TÎ FÜTÄNGÖ
ÂWAKUA TÎ LETÄA
NZÖ ABE AWE!
PANDE
_________________________________________________________________
Na ïrï tî âzo sô kûê amanda tî dîko na tî sû mbëtï na yângâ tî Sängö, ngâ na âla sô kûê sï ahînga atene Sängö alîngbi tî mû mabôko na mäïngö tî Ködörösêse tî Bêafrîka.
Na ïrï tî âla sô ngâ ayeke pîka kate tî âla na yângâ tî ködörö tî âla.
Bûku sô abâa gïgî ndâli tî âla.
_________________________________________________________________
KÔZO TËNË
Töngana ë bâa na yâ tî ngôbo tî âmôlengê tî Ködörösêse tî Bêafrîka, ândarä tî ë mîngi ayeke girisa ndâli tî sô âzo sô sï ahînga nî ayeke sû nî na mbëtï äpe. Na ndembë sô sï âwandarä sô akûi awe, âla hön na hïngängö-ndo tî âla kûê na yâ tî dû. Sô kûê ayeke âmbênî yê sô sï ayeke kânga lêgë na ködörö tî ë tîtene amâi töngana âmbâ tî lo tî ködörö tî âmbunzû. Gï na ôko lêgë sô sï âmôlengê tî Ködörösêse tî Bêafrîka ayeke hînga ka âmbai tî ködörö tî âla nzönî äpe.
Ayeke nzönî tîtene ë kûê ë sû na mbëtï âyê sô ëhînga tîtene kekerêke âmôlengê tî ë ahînga sï asâra na kua tî mâi ködörö tî ë atâa sô sï ëyeke daä ânde mbênî äpe.
Ë sû pande sô tî fa na âzo sô kûê ayeke na ndarä, wala tënë tî fa na âmbâ tî âla, ë tene Sängö ayeke ngâ töngana kötä gira sô sï alîngbi tî bata âmbai na ângôbo tî Ködörösêse tî Bêafrîka.
Wala mo zo sô sï mo hînga mbëtï na yângâ tî mbunzû farânzi, wala mo zo sô mo hînga tî dîko mbëtï na yângâ tî Sängö, alîngbi ë kûê ë löndö lêgë ôko, töngana zo ôko, ë pîka kate tî ë na yângâ tî ködörö tî ë. Ë mû ngangü na lo tîtene lo mâi. Ë sû mbëtî na yângâ tî Sängö.
_________________________________________________________________
Mâleyömbö ayeke mbênî wakua tî letäa. Lo yeke zo sô lo yê kua tî lo mîngi. Âzo tî yâ tî vaka sô sï lo yeke längö daä sô ayê tënë tî lo mîngi ngbanga tî nzonî dutï tî lo na yângâda tî lo na âsëwä tî lo.
Mâleyömbö asâra lâsô ngû balëôko na ûse na kua awe. Lo yeke na wâlï ôko na âmôlengê miambe . Depîi sô lo yeke sâra kua sô, lo de tî wara päsä tî lekere da tî li tî lo äpe. Lo yeke luêe gï da lüëngö.
Na parâse tî kua tî lo, âmbâ tî lo asoro lo töngana delegë, watokua tî âla na yâ tî âpïkängö pätärä na govoromäa.
Na yâ tî vaka tî lo, lo yeke na yâ tî bûngbi tî âwandarä, lo yeke töngana wamüngö-wängö. Töngana âzo awara tënë na yâ tî sëwä tî âla, âla yeke hûnda na lo tîtene lo gbû kokö na pöpö tî âla.
Yênî ôkô, na yâ tî ânze sô, dütï tî lo asanzëe. Lo yeke fono lo yeke kîri na da hîo mbênî äpe. Lo yeke tene na wâlï tî lo lo tene nï yeke löndö gï na âparâse tî gbüngö-li na âmbâ tî nï tî kâmâkîte, ndâli tî sö âkötä tënë tî ködörö abâa gîgî mîngi na yâ tî âlängö nî sô.
Bîanî, âzo tî kua asâra ngonzo na yâ tî âlängö sô ndâli tî nginza tî âla sô sï âla wara äpe anînga. Ndâli nî, Mâleyömbö ayeke gue na kua äpe. Âzo tî kua angbâ tî pîka pätärä na govoromäa tîtene âla wara lêgë tî mängö terê sï âla kîri âla gbû mbätä tî kua tî âla.
[fin de l’extrait disponible]